周六晚英超好波連場，其中曼聯將會主場火併哈特斯菲爾德。新升班嘅哈特斯菲爾德狀態下滑，不過球隊聯賽首循環同「紅魔」碰頭竟然爆冷贏2比1，可見佢哋降魔頗有心得，加上近7仗面對Big6球隊全開3球或以上，呢場就算面對強陣出擊嘅曼聯，都有望破蛋，呢場入波肯定唔少，中位數2.5球入球大有得諗。
（Now 621及LeSports周六晚上11時直播）
作為首次升上英超嘅球隊，哈特斯菲爾德喺聯賽中嘅實力絕對唔算出色，今季7鬥Big6球隊輸咗6仗，仲成為英超強手嘅出氣袋經常大敗，包括上仗聯賽0比3遭利物浦擊潰。不過球隊喺領隊大衞華拿調教下，聯賽都威過幾次，其中肯定唔少得季初以2比1為曼聯送上聯賽首敗，嗰場有波入嘅10號仔阿倫穆爾亦因此一戰成名，呢場有佢坐鎮，哈特斯菲爾德攻力總算有保障。
曼聯上仗遭熱刺擊敗痛失3分，加上為報首循環輸波嘅一戰之仇，返到主場肯定搏盡爭勝，尤其呢場好大機會係新兵阿歷斯山齊士喺奧脫福主場球迷面前嘅首騷，為博「魔迷」歡心智利前鋒肯定落多幾成力爭取入球，加上呢位新兵今季為舊東家阿仙奴上陣對哈特斯菲爾德就入過波，曼聯有佢唔驚冇波入，中位數2.5球入球大唔好錯過。