今晚繼續有德國盃8強賽事，其中史浩克04主場迎戰禾夫斯堡，兩隊波格食格，近4次交鋒，史浩克獲得3勝1和，而近8次主場鬥禾堡，更加贏咗7次。更何況禾堡深受降班威脅，無力兼顧盃賽，睇好史浩克04可以贏波晉級，直取主勝。
（無綫 myTV SUPER 94周四凌晨3時45分直播）
史浩克04上仗德甲領先下，因為後衞拿斯達錫被逐，搞到補時被雲達不來梅反勝，實屬不幸。在此之前，史浩克今季主場都只係輸過畀超班嘅拜仁慕尼黑，水準仍然可靠。最重要係史軍近8次主場對禾夫斯堡，獲得7勝1和，其中7次上半場就已經領先，贏得好有說服力。
禾夫斯堡作客捱打
禾夫斯堡喺冬季轉會窗放走箭頭馬里奧高美斯，另一射手奧歷治亦缺態，火力大減，歇冬後4場聯賽只入3球。再睇埋禾堡近10場作客僅1勝，近5場作客入得1球，恐怕今場都係捱打居多，相信係時候行人止步。