今晚好波連場，西甲上演「加泰羅尼亞」打吡，愛斯賓奴主場對巴塞隆拿，以波論波，「一哥」巴塞當然高兩班，但愛斯賓奴踢打吡戰，特別醒神，上月西盃主場更加「零封」巴塞，爆冷贏1比0，進一步提升信心，隨時再次令巴塞陷入苦戰，最好揀中位數2.5球嘅入球細。
（Now 632周日晚11時15分直播）
雖然巴塞隆拿向以攻力強橫見稱，但作客同市「細佬」愛斯賓奴，卻往往有心無力，近6次作客「愛奴」，有5次總入球係2球或以下，上月西盃8強首回合作客更加輸0比1，就算次回合返回主場都係僅勝2比0晉級，實在唔好期望巴塞可以大炒對手。
事實上，愛斯賓奴遇上其他強隊，亦非任由對手魚肉，今季主場贏過馬體會1比0，作客皇馬亦只係小負0比2，預料今場鬥巴塞，又會再次陷入拉鋸局面，入波唔會多。
華倫回落難敵馬體會
另1場西甲大戰，馬德里體育會主場對華倫西亞，「蝙蝠兵團」華倫西亞已失去上半季氣勢，聯賽及盃賽，近4場輸晒，加上過去5次作客馬體會，亦輸咗4次，其中3次輸2球或以上，今場受讓一球都博唔過，揀馬體會上盤。
（Now 632周一凌晨3時45分直播）
摩納哥里昂演入球騷
法甲摩納哥主場迎戰里昂，摩納哥一向攻強守弱，以「老虎」法卡奧、湯馬士林馬、巴爾迪基達為首嘅鋒線，今季23場聯賽共入53球。里昂亦唔示弱，亦有52個聯賽入球進帳，其中進攻中場費基亞近8仗合共攻入6球，配合迪比及馬里安奴兩大高質素射手，今場可望上演入球騷，捧入球大。
（無綫myTV SUPER 303台周一凌晨4時直播）