沙拿哈神正面交鋒
今晚英超重頭戲利物浦主場對熱刺，穆罕默德沙拿及哈利卡尼兩位金靴大熱正面交鋒！「紅軍」沙拿今季大爆發，聯賽轟入19個入球，只落後哈利卡尼兩球，係「哈神」爭取金靴3連霸嘅最大挑戰者，但「紅軍」豆腐防線點睇都難阻哈利卡尼數胡，入球中位數2.5球大盤，1.54倍屬熱爆首選！
（Now 621及LeSports 周一凌晨零時30分直播)
利物浦今季攻強守弱，即使上月用天價買入中堅華基爾雲迪積克，暫時未見有好大作用，近兩仗主場就共失6粒。好在由穆罕默德沙拿、羅拔圖法明奴與沙迪奧文尼組成嘅鋒線夠威力，近10仗怒轟27球，主場出擊必定繼續壓前搶攻。
熱刺「入球機器」哈利卡尼狀態大勇，單計近5仗就轟入6粒，加上冬季轉會窗羅致速度奇高嘅巴西前鋒盧卡斯洛迪古斯，亦有望今晚首演，為「哈神」製造更多機會，配合孫興民、迪利阿里等好手，作客有本錢鬥攻。
利物浦近5主場全開大
熱刺暫以2分落後畀「紅軍」及車路士排第5，佢哋上周中贏完曼聯，今仗之後包括「北倫敦打吡」鬥阿仙奴，以及歐聯16強首回合作客祖雲達斯，跟手場場硬嘢，但今仗關係前4席位，作客自然想全取3分反先對手，睇番「紅軍」近5仗主場出現咗23個士哥，總入球全開3球或以上，今晚等睇入球騷。