歐聯16強淘汰賽下周展開，阿King提醒大家揀波時要考慮埋呢個因素，不過今日推介嘅祖雲達斯就唔使擔心，事關佢哋依家喺聯賽同拿玻里鬥到難分難解，今場作客遇「私房菜」費倫天拿冇留力餘地，1.73倍客W可作過關重心。
（無綫myTV SUPER 302周六凌晨3時45分直播）
祖雲達斯近10場聯賽9勝1和，其中9場冇失波，雖然射手保羅戴巴拿仍然因傷缺陣，但另一射手希古恩上仗連中三元，協助祖記大炒薩斯索羅7比0，攻守都勁到無倫。祖記現以1分落後「1哥」拿玻里，就算下周中歐聯16強首回合要對熱刺，今場都冇留力空間，戰意唔使懷疑。費倫天拿今季跌Watt暫排第11位，真正「高不成、低不就」，加上近6次聯賽對祖記只贏過1次，其餘5次輸晒，客W有1.73倍值捧。
聖伊天回勇同馬賽駁火
其餘心水推介，先講法甲聖伊天主場對馬賽。馬賽近7仗6勝1和轟入26球，單係近兩仗入咗15粒，一班前鋒着晒火，不過聖伊天聯賽兩連勝亦見回勇，大盤好路。（無綫myTV SUPER 303周六凌晨3時45分直播）最後西甲畢爾包主場對拉斯彭馬斯，畢爾包連續4場聯賽未贏過，拉斯彭馬斯作客5連敗亦曳，初段必小心為上，半場和可敲。
（Now 632周六凌晨4時直播）