沙拿爭金靴入球停不了
周六晚英超有多場好戲上演，其中利物浦將會主場對韋斯咸。眾所周知，紅軍今季有前冇後，聯賽入球數僅次「1哥」曼城，弊在一班後衞不時夢遊球場，搞到近4仗主場聯賽中，有3次總入球都係4球或以上，呢場面對防守同樣麻麻嘅韋斯咸，中位數3.5球嘅入球大最穩陣。
（Now 621及LeSports周六晚上11時直播）
對球迷嚟講，愛隊贏到波固然重要，如果仲可以入多幾粒，就梗係拍爛手掌，今季利物浦fans可以話有「50%幸福」，因為紅軍喺不嬲主攻嘅領隊高普調教下，進攻體系已經成熟，精彩入球不絕，好似啱啱喺歐聯就以5比0炒起波圖，沙迪奧文尼仲一口氣入咗3粒，氣勢勁到冇朋友。講到利物浦最弗嗰個，就一定係穆罕默德沙拿！呢位「埃及美斯」今季喺射手榜同熱刺哈利卡尼鬥得精彩，已連續5場波有士哥，值得一提嘅係，沙拿喺英超首次梅開二度，就正正係首循環作客贏韋斯咸4比1嗰場，今場回師晏菲路再戰，為爭金靴隨時省多幾粒都唔奇。
不過，利物浦防守方面始終未見起色，即使重金買入中堅華基爾雲迪積克，但佢無論拍住洛夫雲抑或祖爾麥迪比，「派膠」情況屢見不鮮，隨時呢頭入完轉頭就失波，1.14倍熱W同讓球主勝「-2」一樣買唔落手。
韋斯咸有力駁火
另一邊廂，「錘仔幫」韋斯咸今季後防表現一般，係英超失球數第4多嘅球隊，今仗仲有後衞馬蘇亞古停賽，對住火力咁猛嘅利物浦想唔失波都難。好彩佢哋嘅攻擊組合有貨交，包括畀領隊莫耶斯點醒咗嘅阿拿奧杜域，仲有近4仗入3球、狀態復甦嘅「小豆」查維亞靴南迪斯，面對紅軍一班「慌失失」後防，要數胡唔難，加上兩隊近3次交手總入球都係開4球或以上，有埋往績支持，今場大家可以買定花生等睇入球騷，中位數3.5球大盤值捧。