防線不整 普巴低迷
周四凌晨歐聯16強首回合焦點戰，西維爾將會主場火併曼聯。「紅魔」雖然歐聯經驗較為豐富，不過球隊近期作客表現低迷，近2仗喺英超就全部輸晒，仲有多位防線主力倦勤，後防唔算穩陣，相反西維爾今季各項賽事主場只係輸過1仗，有主場球迷吶喊助威表現明顯醒目好多，我細鬼就覺得佢哋呢場有力同曼聯力併，平手盤一於捧西維爾。
（有線61、64、201及203台周四凌晨3時45分直播）
聯賽畀超晒班嘅同市死敵曼城拋開成條街嘅曼聯，今季問鼎英超嘅機會似乎已經凍過水，主要原因絕對係因為「紅魔」作客表現飄忽，佢哋聯賽頻頻喺客場失分，近兩仗就全部輸晒，包括0比1輸畀今季新升上英超嘅紐卡素。其中主力中場保羅普巴近期狀態低迷，喺對紐卡素嗰場波佢被換出後神情恍惚，好似冇晒鬥志咁成嗰人散晒，信心大受打擊，呢位法國中場近期上陣時間大幅下降，明顯失寵於領隊莫連奴，仲有傳季尾有可能離隊。冇咗佢曼聯中場創造力肯定差幾瓣，加上後防主力馬高斯盧祖同菲爾鍾斯齊齊有傷缺陣，「紅魔」呢場作客想贏絕對唔易。
西維爾主場硬淨可拔頭籌
另一邊廂，過往曾經連續3屆捧起歐霸盃嘅西維爾，今季主場夠晒硬淨，聯賽主場取得7勝3和1負嘅不俗成績，只係喺同市打吡輸過畀貝迪斯，近期仲先後淘汰馬德里體育會同雷加利斯，殺入西班牙盃決賽，可見球隊踢盃賽頗有心得，加上隊中多位主力都有喺英超揾食嘅經驗，包括中場尼桑斯同捷西斯拿華斯，面對曼聯肯定唔會怯場，呢場睇好佢哋乘主場之利先拔頭籌。