FC東京大變身唔穩定
新一季日職好戲連場，今日焦點之戰由FC東京主場對浦和紅鑽。紅鑽上季因為將全副精神放喺亞冠盃，搞到聯賽成績大倒退，今季冇咗亞冠盃後顧之憂，可以全力踢聯賽，相信表現會大反彈，特別係近8次對FC東京全勝，料可打響頭炮，直取浦和紅鑽客勝。
（有線148台周六下午1時直播）
浦和紅鑽上季相隔10年再次捧亞冠盃，但顧此失彼，喺日職僅得第7名，日皇盃亦於16強出局，令球隊失落今屆亞冠盃參賽資格。雖然紅鑽今季無法衞冕亞冠盃，連梅崎司、矢島慎也、高木俊幸等功臣都他投，好在主力如興梠慎三、柏木陽介及槙野智章仍然留隊，同時仲由橫濱水手羅致昆頓馬天奴斯，頂替轉投中甲武漢卓爾嘅巴西鋒將拿費爾達施華，前、中、後三線實力喺日職水平依然超班，毫無疑問係今季爭標熱門之一。
東京失雙箭死火
上季聯賽僅得第13名嘅FC東京，今季改由前大阪飛腳主帥長谷川健太執教，球員方面亦有唔少變動，前國腳石川直宏收山，鋒將大久保嘉人效力1季後離隊，重返川崎前鋒，尼日利亞射手彼得烏達卡借用期滿亦告離隊，兩人上季合共於聯賽攻入16球，對FC東京有一定影響。而且佢哋今季人腳變化大之餘，又可能重用年僅16歲嘅新星久保建英，不穩定因素比較多，季初不宜抱太高期望。總計聯賽及盃賽，紅鑽近8次面對FC東京錄得全勝佳績，往績佔盡上風，今仗作客有力全取3分。