歐霸出局心傷腳軟
今晚賽事戲碼唔錯，阿King重點推介意甲卡利亞里主場對拿玻里，睇牌面拿玻里遠勝一籌，但要留意呢支勁旅有「歐戰後腳軟症」，特別係近5次踢完歐洲賽後，喺緊接嘅聯賽，總入球都係兩球或以下。拿玻里剛於上周中歐霸盃力戰之下出局，未必回得切氣，最好揀入球細。
（myTV SUPER 302台周二凌晨3時45分直播）
拿玻里喺上場歐霸盃32強次回合搏到盡，作客以2比0擊敗RB萊比錫，兩回合計打和3比3，但拿玻里因為作客入球唔及對手多，黯然出局，認真打擊士氣。睇番拿玻里近5次歐洲賽後緊接嘅聯賽，都有「死火」情況發生，其中3次打和0比0，2次小勝1比0，恐怕今場炒唔起卡利亞里。
卡利亞里近7次主場只有1勝1和5負，當然鬥唔過拿玻里，相信只能死守，希望偷雞攞到分。卡利亞里曾於1月聯賽主場對另一支勁旅祖雲達斯，踢到下半場中段先至失守，僅負0比1，所以今場未必會大敗。拿玻里客Ｗ賠率乏味，上盤風險亦高，最好揀入球細。
士砵亭夠炒摩里倫斯
葡超方面，布拉加近兩次主場對唐迪拉都贏兩球或以上，擺明格食格，可直取讓球主勝。另一場，士砵亭今季聯賽主場12戰取得10勝2和，近6場聯賽主場更全勝兼冇失波，有力大炒摩里倫斯，士砵亭讓到兩球都要讓球主勝。
（有線155台周二清晨5時直播）