大簡教波冇料到
亞冠盃G組上演「中日大戰」，日職勁旅大阪櫻花主場鬥中超豪門FC廣州（廣州恒大淘寶），FC廣州見過鬼仲未怕黑，今季請番簡拿華路執教，呢位意大利名宿3年前執教FC廣州僅半年，就因為成績差被炒魷，今次回巢都係唔掂，上仗亞冠盃主場被泰國球隊武里南聯逼和，今次遠赴日本比賽，實在唔樂觀，平手盤捧大阪櫻花。
（Now 670及Fox Sports Play周三晚6時直播）
作客日本更惡踢
簡拿華路球員時代捧過世界盃、西甲冠軍、金球獎等榮譽，但踢波叻並唔代表教波都掂；2014年尾佢接替恩師納比執教FC廣州，但半年後就被史高拉利取代。之後執教沙特阿拉伯球隊艾納斯唔夠4個月，結果又要執包袱，直至兩年前成為天津權健主帥，簡拿華路先至做出一啲成績，帶領球隊升上中超，上季仲獲得聯賽季軍。
不過，簡拿華路「衣錦還鄉」教FC廣州又出事，上仗亞冠盃對武里南聯，最終被對手追和1比1，全隊表現走晒樣。「大簡」亦毫無應對方法，一味用高波轟炸「博大霧」，結果眼白白睇住球隊失咗2分。主場對住泰國球隊武里南聯都冇晒符，今場作客日本實力分子大阪櫻花，FC廣州更加無力發圍。
日職雖然未開咧，但大阪櫻花早前捧完日超盃，上仗亞冠盃又擊敗濟洲聯，球隊狀態已經操起，今場正好以FC廣州來祭旗，為新球季壯聲勢。