今晚英超早場上演「倫敦打吡」，水晶宮主場迎戰熱刺， 話就話係同市打吡戰，但雙方實力一向存在好大差距，淨係睇兩隊近5次聯賽交鋒，熱刺獲得全勝，就知水晶宮根本冇得鬥。更何況熱刺現時正全力衝刺力爭打入英超前4位，確保參加下屆歐聯資格，今場必毫無保留搏到盡，一於直取熱刺讓球客勝。
（Now 622及LeSports HK周日晚8時直播）
未計前晚賽事，第2位至第5位球隊，只有4分距離，1輪聯賽足以改變下屆歐聯參賽資格嘅爭逐形勢。第5位嘅熱刺形勢稍為輸蝕，更加急需搶分，務求盡快反超前。熱刺今場最大優勢係往績一向剋住水晶宮，近6次交鋒，熱刺獲5勝1負，唯一敗仗係英足盃，換言之，熱刺近5次聯賽對水晶宮壓倒性全勝，而且只失1球，佔盡上風。
水晶宮遇強無力還擊
同埋熱刺喺上輪英超「倫敦打吡」以1比0擊敗死敵阿仙奴，今場打吡戰對手只係水晶宮，更加難唔到佢哋。特別係哈利卡尼狀態銳不可當，佢今季聯賽已有23球進帳，要攻陷水晶宮並唔困難，贏兩粒係基本消費。至於水晶宮近4場聯賽只有2和2負，其中上月對另1支倫敦勁旅阿仙奴，更加慘敗1比4，水晶宮該仗上半場已經失4球，可以話係毫無還擊之力。熱刺嘅實力不在阿仙奴之下，水晶宮隨時再被大炒收場。