今夜另1場歐聯16強首回合，德甲班霸拜仁慕尼黑主場對土超比錫達斯。拜仁王牌前鋒羅拔利雲度夫斯基抖夠上陣，必趁主場搶先機，不過門神紐亞仍要養傷，後防或呈不穩，壓得太前實畀比錫達斯偷雞打反擊，中位數3.5球嘅大盤有1.87倍夠吸引。
（有線62及202台周三凌晨3時45分直播）
拜仁之前6屆5度殺入4強兼1次封王，經驗豐富，而上次帶隊捧盃嘅老帥軒歷基斯，季中出山成功穩定軍心，近13仗正式賽事贏晒，上仗聯賽作客禾夫斯堡，射手羅拔利雲度夫斯基同湯馬士梅拿先列後備明顯留力，而「羅拔仔」後備上陣末段入波奠勝，近6仗入6粒弗到爆，自然希望主場盡數鎖定出線資格。不過隊長兼門神紐亞今季大部分時間養傷，而中堅曉姆斯及謝路美保定亦好番冇耐，防線未及以往穩陣，近8仗賽事只得兩場冇失波。
比錫達斯反擊煞食
客軍比錫達斯雖有射手辛克杜辛離隊，但仍有尼格度、賴恩巴布及哥利斯馬等進攻好手，若然拜仁全軍壓上，啱晒佢哋打反擊，爭取作客入球，今仗睇怕多波入，中位數3.5球大盤不容錯過。