歐聯激戰後唔易撻着
英超今晚上演重量級大戰，「紅魔鬼」曼聯主場硬撼「藍戰士」車路士，今仗勝負直接影響雙雄爭逐聯賽前4嘅機會，不過兩軍周中都經過歐聯16強激戰，回氣需時，而且雙方近8次交鋒有7次總入球都係開2球或以下，今仗首選中位數2.5球細盤。
（Now 621及LeSports HK周日晚10時05分直播）
曼聯周中歐聯16強首回合作客西維爾悶和0比0，付出唔少力量，未踢今輪比賽前，聯賽榜2哥曼聯只比第4位嘅車路士多3分，今仗輸波就會被對方追至同分，以莫連奴每遇強隊都守為先嘅保守性格，就算有地利之助，相信亦會貫徹佢嘅招牌「泊大巴戰術」。
車路士作客曳以穩為先
事實上，曼聯前線雖然加入咗阿歷斯山齊士，但呢位智利王牌多數時間都單打獨鬥，甚至拖慢整體進攻節奏，加上保羅普巴、連格等中場狀態低迷，前鋒盧卡古又「欺善怕惡」，對強隊經常冇表現，令曼聯缺乏破關本錢。幸紅魔防守保持水準，聯賽連盃賽近6仗主場有5仗零失球，表現穩健。
車路士上仗喺歐聯16強首回合同巴塞隆拿激戰踢成1比1，消耗唔少體力同樣要回氣，而且對巴塞所失1球乃後防犯錯所致，今仗定必打醒十二分精神。車路士近期作客表現欠佳，聯賽連盃賽近6仗作客只得1勝3和2負，就算近8次對賽車路士有4勝3和1負較佳成績，作客奧脫福亦唔會輕舉妄動，開細[2.5球]機會高唱入雲。