美斯8次砌車零士哥
歐聯16強首回合今晚「冤家路窄」，車路士主場迎戰巴塞隆拿！兩大豪門屬歐聯「老對手」，雖然近年成績巴塞佔上風，但佢哋近年對親車仔都「冇啖好食」，王牌射手美斯更被「車仔魔咒」纏身，作客史丹福橋冇本錢讓波，1.77倍讓球主勝絕對係新春賀禮！
（有線61及201台周三凌晨3時45分直播）
車路士早前成績飄忽，領隊干地飽受壓力，歐聯將係佢保住帥位嘅關鍵，好在車路士踢歐聯表現唔曳，即使16強抽中「下籤」鬥巴塞，但原來計往績車仔絕不輸蝕，兩軍過去12次歐聯交鋒，車路士獲4勝5和3負成績，不敗率達75%，對上7次對「地上最強」全部唔使輸，主場受讓抵玩。
車仔雙塔恰到地上最強
再者，車路士前鋒艾華路莫拉達已傷愈，加上新箭頭基奧特愈踢愈好，呢兩位「空中霸王」正好發揮出巴塞最驚嘅高空轟炸。唔好忘記「地上最強」巴塞歐聯作客一般，近5仗歐聯作客只得1勝2和2負，呢5場波更加只入過1球，完全踢唔出爭冠霸氣。
不過最令巴塞擔心嘅係，美斯對親車路士都冇運行，呢位阿根廷球王破過無數勁敵大門，偏偏歷來8次同車路士交鋒，29次埋門1球不入，最經典係2012年歐聯4強，美斯主射12碼中楣連累球隊出局，唔到你唔信邪。若然美斯擺脫唔到心魔，巴塞贏波機會自然大減，一於捧車仔今晚主場不敗！