強強對碰必有大手交易
今晚英格蘭聯賽盃上演決賽，由阿仙奴同曼城喺中立場溫布萊球場，爭奪今季首項錦標。英聯盃已由過往嘅雞肋升格為強隊「護身符」，唔理係盃仔，起碼贏咗可氹住班管理層同球迷先，故兩隊今仗絕唔會手軟，曼城今季對強隊例必大手交易，建議捧中位數2.5球嘅入球大。
（周一凌晨零時30分開賽）
曼城依家喺聯賽遙遙領先，聯賽冠軍已經係囊中物，不過哥迪奧拿上季初來埗到食白果，今次絕唔會放過喺英格蘭首次捧盃機會，尤其係曼城上周喺足總盃爆冷不敵甲組仔韋根，真係乜面都冇晒，今場肯定加多兩錢肉緊，務求拎番個雙料冠軍至收貨，以目前曼城人腳同狀態，呢個願望唔難做到，問題係今場盤口曼城讓半一低水唔多吸引，倒不如博吓大盤，分分鐘可提早搞掂。
「藍月亮」對Big6多入波
睇番「藍月亮」今季對強隊都相當多入球出現，6次對Big 6球隊有5次出現大盤，當中聯賽對阿仙奴贏3比1，鬥熱刺同利物浦更癲，閒閒地都有5至7球出現，哥迪奧拿踢法進取，即使係決賽戰術亦唔會保守，所以唔使擔心兩隊今場會鬥泊大巴。
雖然賽前傳出曼城前鋒加比爾捷西斯及史達寧均有傷，今仗未必上陣，但曼城實在太人才濟濟，對整體實力影響唔大。至於阿仙奴方面，奧斯爾及艾朗藍斯分別因病及傷患缺席操練，但情況唔係太壞，今場均有機會披甲，不過米希達利恩則因為曾替曼聯披甲，決賽無緣登場。
兩軍齊用副選門將把關
今場另一開大有利因素係兩隊均有機會派二號門將把關，阿仙奴嘅奧斯賓拿近年上陣機會少，上周中歐霸對瑞典球會奧斯達辛斯亦失兩粒，對信心點都有影響。至於曼城嘅哥迪奧巴禾今季亦主要喺本土盃賽上陣，但佢表現一向騰雞，對開大盤絕對係好事。