今晚歐洲各大聯賽嘅戲碼比較平淡，由於筆者近年經常評述意甲，不妨揀2場為大家分析。先講頭場，在意大利北部、鄰近瑞士及法國兼喺阿爾卑斯山山腰下嘅都靈市打吡戰，由拖連奴主場硬撼「2哥」祖雲達斯。拖連奴只排第9位，高不成、低不就，難與「斑馬兵團」相提並論，不過祖雲達斯今季明顯跌Watt，未踢今輪之前，仍落後榜首拿玻里1分，同以往在季中甩開成條街相差甚遠，喺上周中歐聯16強首回合領先2球之下，喺主場畀熱刺逼和2比2，嗰場梅開二度嘅希古恩卻射失12碼成關鍵，士氣受挫，現時處於信心危機，而且打吡戰場合，拖連奴實搏甩髀，主場出擊仲受讓半一，下盤值得捧場。
至於夜少少開波嘅榜尾大戰，意大利南部球隊兼包尾嘅賓尼雲圖，主場火併尾4嘅克羅托內。賓尼雲圖今季升上意甲後，踢咗24場只得7分（2勝1和21負），但要留意呢7分都係主場取得，可見佢哋嘅熱情球迷支持下戰意十足，而且克羅托內今季聯賽12場作客贏得2場，質素唔見得更高，今仗開出平手盤，寧捧賓尼雲圖。