新季今晚揭幕
新一季日職周五晚揭開序幕，打頭陣嘅有鳥棲砂岩主場迎戰神戶勝利船。砂岩今季將沿用上季主力班底出戰，夾慣夾熟默契肯定不俗，加上砂岩近5次面對勝利船取得3勝2和嘅不敗往績，呢場對住名大於實嘅勝利船取勝冇難度，睇好佢哋取得賽季開門紅，主勝唔好錯過。
（有線61及201台周五晚7時直播）
上季以第8名過終點嘅砂岩絕對係主強客弱，單計聯賽17仗主場出擊取得11勝1和5負，主場成績排日職第4，僅次於川崎前鋒、鹿島鹿角同大阪櫻花幾支聯賽前列分子，表現算係對得住入場睇波嘅球迷，水準咁穩定，賽季首戰肯定希望乘主場優勢取勝。雖然前鋒豐田陽平因同主帥不和，離隊轉戰韓職，不過佢上季已經鮮有上陣機會，所以影響應該唔會好大，加上主力班底都選擇留隊，包括首席射手兼中場核心原川力，以及一對箭頭域陀伊巴保同趙東建，實力依然雄厚。
神戶「巴塞化」自己捉蟲
神戶勝利船上季高調引入前德國國家隊射手普多斯基，可惜雷聲大、雨點小，最終只係以第9名完成賽季，排名仲低過砂岩，佢哋新球季一口氣引入8位新兵，仲打正旗號踢法要玩「巴塞化」，更訂立聯賽躋身前五、盃賽攞個冠軍嘅目標，可惜人腳變動太大，默契肯定輸砂岩好幾條街，而且東施效顰學「地上最強」搓波，更加衰多幾錢，呢場作客難有勝算，捧番主勝好過。