近況對辦「雙殺」冇難度
歐霸32強次回合，周五凌晨阿特蘭大回師主場再鬥多蒙特。「蜜蜂兵團」自新帥史杜加12月接手後一洗頹風，尤其各項賽事近4仗全勝，今場仲帶住首回合3比2嘅領先優勢，面對近期戰績飄忽嘅阿特蘭大，度士睇好呢場多蒙特可以贏多鋪，平手盤必捧多蒙特。
（Now 631周五凌晨4時05分直播）
季初表現麻麻嘅多蒙特，除咗喺聯賽畀1哥拜仁慕尼黑拋離19分之外，仲喺歐聯分組賽階段6戰不勝慘遭淘汰要轉戰歐霸，可幸球會及時搵嚟前科隆主帥史杜加接手，表現總算重回正軌。由於爭奪聯賽幾乎無望，國內盃賽又已早早被淘汰，歐霸盃就成為球隊今季唯一嘅錦標希望，相信多蒙特為爭冠軍肯定會不遺餘力。1月轉會窗引入嘅巴舒亞伊表現勁爭氣，首次上陣就為蜜蜂兵團梅開二度不特止，近4仗仲入夠5球，同班波一拍即合，加上重傷抖足大半年嘅馬高列奧斯復出後表現對辦，有佢哋拍住原本實力不俗嘅班底，絕對夠本錢再取勝。
阿特蘭大表現回落
相反阿特蘭大近期狀態有回落迹象，近5仗主場只取1勝1和3負劣績令人堪憂，上仗聯賽主場面對10人應戰嘅中游分子費倫天拿，最終都只係1比1逼和對手，呢場面對強勢反彈兼攻力旺盛嘅多蒙特，未必有力招架，好大機會畀「蜜蜂兵團」雙殺，多蒙特平手盤有買趁早。