火力全開以攻代守
皇家馬德里狗年第1擊，今晚喺西甲作客貝迪斯，「銀河艦隊」今季聯賽表現令人失望，衞冕希望名存實亡，好彩佢哋近期火力全面回升，後面失幾多球都有前面入番夠本，今仗遇牌面稍遜嘅貝迪斯，中位數3.5球嘅大盤係最佳選擇。
(Now 632周一凌晨3時45分直播)
皇馬今季條防線不穩，連續7場聯賽都有失波，呢點亦係球隊今季成績低落主因，不過近期以C朗拿度為首嘅鋒線就相當爭氣，近4仗聯賽狂入18球，呢4場聯賽總入球都達4球或以上。啱啱佢哋又喺歐聯16強以3比1反勝巴黎聖日耳門，除咗打起晒成班波嘅信心，其中C朗仲梅開二度，近4場賽事轟入7球弗到漏油。值得留意嘅係，皇馬翼鋒加里夫巴利喺呢場歐聯只係後備上陣，體力得以保留下，今仗對貝迪斯有機會復任正選，到時皇馬想入多幾粒都冇問題！
貝迪斯主場唔會縮
主隊貝迪斯屬於重攻輕守球隊，尤其主場出擊更加肆無忌憚進攻，經常製造誇張賽果，今季就曾經主場3比6輸畀華倫西亞，以及0比5不敵巴塞隆拿，好消息係哥斯達黎加前鋒祖爾甘保傷愈復操，而上仗疑似拉傷嘅中場古亞達度，證實無乜大礙，貝迪斯嘅鋒力將得到進一步提升，今仗有望同皇馬合演入球Show。