鬥心十足
同晚另一場歐霸盃，兩支由歐聯降格嘅球隊交鋒，RB萊比錫主場對拿玻里。拿玻里今季一心要重奪意甲冠軍，早已「放棄」歐霸盃，首回合收起多位主力搞到輸1比3，今仗作客更加無謂搏。RB萊比錫首屆出戰歐洲賽，為創佳績鬥心勝一籌，主勝好路。
（Now 632周五凌晨2時直播）
拿玻里專心意甲爭雄
拿玻里目前以1分力壓祖雲達斯，排意甲榜首，有機會繼1990年「馬納當拿時代」後，相隔28年再嘗聯賽錦標滋味，全隊都向呢個目標進發。歐聯出局後，教練沙利已明示會將歐霸盃「放埋一邊」，專注聯賽。果然首回合，沙利排出嘅正選陣容，收起4位主力梅頓斯、恩斯治尼、佐真奴費路、亞倫盧利奧，人腳不整兼冇鬥心，自然唔夠砌。主場出擊都放軟手腳，更何況現已處於出局邊緣，仲要作客，更加唔會搏。
RB萊比錫今屆首次出戰歐洲賽，表現唔錯，歐聯分組賽主場擊敗波圖，對上屆4強摩納哥，更加取得1勝1和。雖然RB萊比錫最後都要降格踢歐霸盃，但對呢支「新丁」來講，都係1次難得機會，相信會全力爭取佳績，創造歷史，盡力爭取每場都要贏波。