以往球壇曾出現多個傳奇王朝，從上世紀50年代皇家馬德里、70年代嘅阿積士與拜仁慕尼黑、80年代嘅利物浦、90年代嘅AC米蘭，由費格遜領導嘅曼聯更雄霸英超廿載，中間穿插阿仙奴不敗封王，以上每一幕堪稱經典，但放在現今球壇，呢類不敗奇兵、打極都有嘅傳奇球員可謂少之又少，何解呢？
從主觀嘅陰謀論角度嚟睇，現代足球金錢掛帥，好多賽事牽涉龐大利益收入，有人從中造假亦不足為奇。若果從客觀分析，始終依家比賽賽程太頻密，一周雙賽只屬等閒事，球員容易受傷及出現疲態，表現自然打折扣，亦正因如此，球員都開始「選擇性比賽」，重要賽事當然搏到盡，至於其他比賽難免會錫身，昔日打甩門牙帶血吞嘅場面，再難經常出現。
同樣地，喺主帥嘅立場，一季有咁多賽事，需要識分輕重，聯賽及歐聯當然必爭，其他盃仔隨時留力，派遣副選應付了事，而球員知道主帥唔重視呢類賽事，對爭勝嘅飢渴感亦有所下降，好似周中歐霸32強次回合，由於阿仙奴首回合作客大勝3比0，返主場再鬥奧斯達辛斯，輸2球都晉級唔通仲搏甩髀咩？最終輸1比2有辦你睇。加上現時出色嘅主帥唔多，而且高層急功近利嘅營運模式，一旦戰績欠佳，主帥便首當其衝「落鑊」，試問邊有時間去打造一支不敗奇兵呢？
今晚英超主隊惡晒
講番今晚英超，李斯特城主場對史篤城、利物浦主場對韋斯咸、般尼主場對修咸頓、般尼茅夫主場對紐卡素、白禮頓主場對史雲斯、西布朗主場對哈特斯菲爾德，筆者認為上述6仗，以波論波，主隊都係比較秤先，信不信由你。
金句:不敗奇兵、打不死球員，已成絕世奇葩