今晚兩場歐聯16強首回合，睇牌面都係客隊凌駕主隊，其中曼聯上月簽入阿歷斯山齊士，呢位前阿仙奴射手雖然踢過歐霸，但都合乎資格喺歐聯上陣，令人更加睇好「紅魔鬼」今場可以食硬西維爾。不過，筆者有保留，始終曼聯最近水準比較飄忽，西維爾缸瓦船打老虎，盡地一煲，曼聯唔易贏。
另一場，意甲球隊羅馬牌面都係比較高，但去到天寒地凍嘅烏克蘭，面對當地富豪球隊薩克達，其實都好難踢，加上首回合作客，唔輸已經有着數，所以羅馬踢法上，難免亦會比較保守。趁新春好意頭，和氣生財，筆者推介呢兩場歐聯賽事，和波2串3。富貴險中求，可以再整多1條波膽過關2比3，呢兩場賽事都揀1比1波膽，細細哋玩下，又有波睇，認真和味。
事實上，如果曼聯、羅馬可以首回合作客唔輸，兼攞到作客入球，相信雙方主帥莫連奴、迪法蘭斯高都會滿意收貨，所以筆者推介新春以和為貴嘅博彩方式畀大家。