上星期狗年第一擊，小弟推介西悉尼流浪者力保不敗，順利命中。今日一於乘勝追擊，主打國家打吡墨爾本勝利對阿德萊德聯呢場。近期墨爾本勝利要同時兼顧國內聯賽同亞冠盃，反而阿德萊德聯只係需要專注爭聯賽前6名，目標簡單明確得多，所以今日「阿聯」作客受讓，面對嘅係疲兵「勝利」，有力搶分！（有線64及203台周六下午4時50分直播）
墨爾本勝利分心亞冠盃
墨爾本勝利近期兼顧兩條戰線，聯賽嗰度就要保住喺聯賽榜前6之內，亞冠盃分組賽亦唔可以失威，點知愈緊張就愈唔順，近3場聯賽全部輸晒，而兩場亞冠面對蔚山現代以及對上海SP，戰績都只係1和1敗。
最弊嘅仲係後防穿晒窿，2場比賽已經畀對手入咗7球，就係咁，近10場比賽後防失球數字大幅飆升到20球，真係慘不忍睹，莫非輸到連信心都冇埋？只見近來右閘謝利亞同埋中堅湯馬士丹治不停咁孭鑊。儘管中前場有貝利沙同巴巴路西斯壓陣，但後邊失咁多，佢兩位入入埋埋都唔夠輸啦！
勝利今季主場成績非常一般，10場只贏得2場，以主場成績計，全澳職排第8，真係麻麻地。近期征戰頻頻，體力消耗極大，今日主場出擊都唔敢睇好。
客隊阿德萊德聯近期成績開始回穩，近7場只輸1場，顯見球隊要保住前6名嘅決心。今日有中場大將阿比沙路臣傷愈復出，中前場卡士即刻提升，再加上近期射門腳頭不俗，近2場都能夠攻入對手2球，呢場更加信心十足啦。