今晚歐聯16強首回合戲碼，比周三凌晨更加有睇頭；首先波圖主場對利物浦，睇牌面利記贏晒喇，不過千祈唔好睇小波圖呢支葡超「1哥」，尤其係歐聯淘汰賽階段，稍一不慎就會觸礁。
皇馬PSG難分高下
波圖曾兩度登上歐洲之巔，兩次都係人哋在明、佢哋在暗之下爆冷封王，最近嗰次喺2004年，在當時尚未爆紅嘅主帥莫連奴帶領下，恰巧「在明處」嘅AC米蘭、皇馬、拜仁等豪門相繼出局，波圖「在暗處」下被忽視，卻冷手執個熱煎堆捧盃。利記始終未脫「海鮮味」，面對強隊總會士氣高昂，碰上弱旅反而提唔起勁，投入感大減，造成遇強愈強、遇弱愈弱嘅情況，令粉絲提心吊膽。筆者認為波圖會先求唔輸，利記作客場合和波冇壞。
至於重頭戲皇馬主場硬撼聖日耳門，稱得上係提前上演嘅決賽戲碼。PSG鋒線3叉戟尼馬、卡雲尼、基利安麥巴比今季光芒四射，風頭一時無兩。不過皇馬近兩屆稱霸歐聯之餘，亦係史上奪冠次數最多球隊（12次），BBC鋒線賓施馬、加里夫巴利及C朗經驗豐富，喺西盃出局、蟬聯西甲機會渺茫下，必定喺歐聯盡地一煲，戰意唔使懷疑，皇馬首回合主場未必會輸，今仗不妨以睇波為主，臨場睇形勢再玩走地，畢竟兩雄此番相遇，相信會鬥得難分難解，隨時鬥到次回合才分出高下。