漢諾威慕遜加柏細均力敵
直播戲碼係排聯賽榜第7位嘅漢諾威主場對第10位嘅慕遜加柏，客軍慕遜加柏平均實力雖稍佔優，但近期傷兵滿營，前線全面啞火，今晚遇上漢諾威絕對有得揪，賽前推介有1.98倍嘅中位數2.5球細盤。
漢諾威排名較前又有主場之利，而且歇冬後6輪聯賽3勝2和1負表面睇相當唔錯，不過當中4場係對聯賽榜排名最後5名嘅球隊，比賽水準唔高，何況漢諾威連仗遇弱都攞唔到絕對優勢，目前嘅狀態相當一般，佢哋一向擅長踢穩守突擊，主場想主動出擊搶攻並非所長。
慕遜加柏係歐洲賽常客，可惜近期飽受傷兵問題困擾，當中前線主力拉菲爾基達奴缺陣打擊最大，搞到近期聯賽4連敗之餘仲1球都入唔到，上輪主場僅負於多蒙特雖然表現拚搏，但前線始終搵唔到入波，仲有翼衞贊迪斯基加入傷兵行列，令佢哋嘅傷兵人數增至8人，目前球隊兵源短缺，預期作客唔敢過份急攻。
史甸度倒戈為世盃奮戰
今仗對慕遜加柏隊長史甸度嚟講意義重大，皆因呢位現年29歲嘅全能攻擊手，過去曾長時間擔任漢諾威隊長，今場倒戈遇舊主百般滋味在心頭，雖然佢上季狀態大勇，為德國國家隊上陣亦表現出色，但自去年12月起，至今連續10輪聯賽擔正都毫無建樹，令佢入選今夏德國世盃決賽周大軍嘅資格響起警號，呢個時間當然唔到佢唔搏命，究竟佢可唔可以及時走出低谷？大家今晚一於睇實佢啦！