同日歐聯16強首回合，仲有葡超勁旅波圖周四凌晨主場挑戰利物浦。葡超「1哥」波圖近3次歐聯主場面對英超球隊全勝，戰績彪炳，反觀紅軍今屆歐聯作客表現明顯飄忽，過往遠赴葡萄牙仲經常冇啖好食，呢場未必太冒進，寧願次回合返主場再搏過，細鬼覺得佔主場之利嘅波圖有力守住紅軍攻勢，波圖受讓平半捧得過。
（有線62及202台周四凌晨3時45分直播）
波圖主場專恰英超兵
分組賽搶到第2名晉級嘅波圖近況不俗，主場各項賽事近8仗贏晒，上仗喺聯賽作客都能以4比0大炒查維斯打出氣勢，班波狀態明顯已經為歐聯迎戰利物浦做足準備。而且佢哋近年主場對住英超球隊特別生猛，近3仗大獲全勝，對上一次就以5比0羞辱李斯特城，就連車路士同阿仙奴呢啲傳統強隊造訪都飲恨而回，可見波圖對付英超兵特別有計，今場絕對不容忽視。
利物浦雖然喺分組賽以首名脫穎而出，不過作客表現明顯飄忽，多次畀對手逼和。而且葡萄牙絕對係紅軍凶地，球隊過去4次作客葡超球隊錄得1和3負未贏過，冇往績支持嘅利物浦重回傷心地，未必夠膽放手一搏，作客仲要讓球，寧願捧番波圖下盤。