留力歐聯古天奴擔正搶fo
今晚年初二西甲，「1哥」巴塞隆拿作客伊巴。巴塞雖然嚟緊周中有歐聯對車路士嘅顧慮，但近期聯賽頻頻失分，畀次席馬德里體育會係咁追，谷住成肚火必向伊巴發洩，讓球客勝有買趁早。
（Now 632周六晚11時15分直播）
好多人都話今季西甲冠軍已成巴塞囊中物，不過佢哋連續2場聯賽被愛斯賓奴及基達菲悶和0比0，已經畀次席馬體會愈追愈近，依家只落後7分，絕對唔係坐定粒六，難怪主帥華爾維迪都話唔好大意。
雖然巴塞嚟緊周中有歐聯16強首回合要作客車路士，今仗有可能收起王牌美斯嘅情況下，亦代表佢哋唔搏，特別係季中加盟、但冇得參加歐聯嘅巴西中場菲臘比古天奴，更加唔使勒住勒住，勢必盡騷哥利。
伊巴遇強即屈
「7仔」伊巴近4仗聯賽未輸過，好似好威咁，但佢哋遇強即屈，今季對住巴塞、皇馬、馬體會等勁旅全部輸晒，尤其係對親巴塞例冇運行。雙方近4次交手，伊巴唔單止輸晒，總共失咗18球，仲全部都至少輸2粒，包括首循環大敗1比6，真係未踢都腳仔軟。巴塞近期戰績回落備受批評，已經嬲嬲哋，必定搵伊巴祭旗，為出征歐聯前壯行色，讓球客勝捧得過。