未計周六凌晨賽果，拜仁喺聯賽榜已經領先次席嘅RB萊比錫18分，不過佢哋完全冇放鬆迹象，老帥軒歷基斯功力深厚，晨早就做好輪換工作，佢哋近期比賽經常大幅變陣，基於球隊兵源充裕，加上多名主力傷愈復出，軒帥夠晒條件畀班主力排隊休息，拜仁下周三凌晨就會喺歐聯16強首回合，主場迎戰土耳其球隊比錫達斯，今晚軒帥已經計劃安排主力包括曉姆斯、阿拉巴、甘美治、占士洛迪古斯、湯馬士梅拿、列貝利同羅拔利雲度夫斯基先任後備。
誓速決禾堡 慳力等歐聯
唔好以為拜仁班副選唔夠料，近期多次由洛賓、京士利高文、謝路美保定、哥倫天杜利素同辛度華拿為主嘅陣容都可以輕取對手，今場仲有中場發電機堤亞高艾簡達拿傷愈復出，戰鬥力依然強勁。軒帥向來對緊密賽程有心得：想慳力？最好就係速戰速決，如果能夠及早攞到領先優勢同奠定勝局，到下半場就可以隨形勢發展而進一步作出調動嘞。
禾夫斯堡近況曳，踏入二月後3戰無功，主場迎戰作客蟲史特加固然贏唔到，德國盃畀史浩克04踢出局，上輪作客護級嘅雲達不來梅仲輸到1比3，最慘係傷兵情況惡化，中後場傷兵已累積到6個，主力右閘華希亞治亦患病上陣成疑，今晚弱勢殘陣，好難阻止拜仁由頭贏到尾，推介有1.78倍嘅半全場「客客」。