鋒線夠龍精虎猛
今日「澳職」好戲碼賀歲，由西悉尼流浪者喺主場挑戰「2哥」紐卡素噴射機。噴射機牌面上可能勁啲，但「西流」近期狀態極勇，教練甘巴爾甚獲球員擁戴，上下一心，加上佔主場之利，噴射機作客非但無法輕言穩勝，恐怕還有失手之虞！
（有線64及203台周五下午4時50分直播）
暫排第6嘅「西流」連贏兩場，鋒線大發神威轟入6球，防守亦好硬淨，只失1粒。單睇進攻同防守數字，顯見成隊波相比起甘巴爾初上任時有明顯進步。上場大炒弱旅威靈頓鳳凰4球，突破咗佢哋主場成績一般嘅慣例，近4場主戰獲兩勝1和1負不俗成績，積分追到只差第5位嘅墨爾本勝利1分，仲要少踢1場，過埋今仗隨時又升多級，真係做到新年步步高陞添！
「西流」早前進攻表現麻麻，但從上場所見，球隊嘅創造力顯著加強，進攻板斧亦比之前多變，球員信心處於高位。今日更傳嚟好消息，中場指揮官施祖度應可傷愈復出，鋒力有望進一步提升，對住噴射機絕對有力駁火！
噴射機作客場場有失
客隊紐卡素噴射機今日有翼鋒卓比尼斯同後防佐治夫斯基雙雙復出，人腳更見完整，只不過近期表現冇季初咁Sharp醒，近3場波贏得1場，加上對上一次比賽已係兩周前嘅事，狀態未必及得上以戰養戰嘅「西流」，加上佢哋今季作客場場都有失波，後防唔多穩陣，面對火力回升嘅「西流」，惟有祝佢哋「自求多福」啦！