歐聯主場堅硬淨
歐聯16強首回合周三凌晨一觸即發，祖雲達斯將會先喺主場鬥熱刺。上屆屈居亞軍嘅祖記歐聯經驗老到，尤其老門神保方為首嘅防線陣容固若金湯，面對過往作客意大利表現曳爆嘅熱刺，有望力保不失，呢場大戰好有可能陷入膠着狀態，入波唔慌會多，中位數2.5球入球細係心水推薦。
（有線61及201台周三凌晨3時45分直播）
征意戰績差熱刺唔敢亂攻
近3屆2度殺入歐聯決賽嘅「老婦人」祖記，2次都飲恨而回，對於從未捧起過歐聯獎盃嘅門神保方嚟講，肯定心有不甘，雖然佢今季飽受傷患困擾，不過近期已經好番可以再次披甲，有呢位隊長提場壓陣，肯定為「老婦人」防線打下強心針。而且祖記歐聯征戰經驗豐富，近26仗歐聯主場取16勝10和不敗戰績，多得球隊穩守至上嘅戰術，寧願食白果都要力保不失，佢哋近13仗歐聯主場只失5球，而且有9仗開2球或以下，主力攻擊手保羅戴巴拿有傷，缺乏攻擊力嘅祖記只會更堅決採取保守戰術。
相反熱刺雖然力壓衞冕歐聯嘅皇家馬德里以小組首名晉級，不過佢哋作客意大利嘅戰績麻麻，近8次只取1勝3和4負，冇往績支持，熱刺呢場相信都唔敢冒進，寧願留到次回合再搏過，中位數2.5球入球細，絕對不容錯過。