火併巴塞前 錫住侯城
周六凌晨英足盃16強，車路士將會坐鎮主場對英冠球隊侯城。侯城今季跌落英冠後一蹶不振，狀態同實力都欠奉，相反車路士近期面對侯城佔盡上風，取勝冇難度，不過兩隊近7仗有6次都開2球或以下，而且「藍軍」下周中即將喺歐聯火併強敵巴塞，相信佢哋呢場都會見好就收，唔會搏盡，中位數2.5球入球細有2.45倍絕對抵玩。
（ViuTV 99及Now 633周六凌晨4時直播）
之前聯賽2連敗嘅車路士曾陷入低潮，一時間領隊干地畀球會叮走嘅傳聞上晒各大頭條，好在上仗佢哋終於以3比0擊敗西布朗，取得漂亮勝仗之餘，帥位不穩嘅干地終於可以鬆番口氣。嗰場波新兵基奧特大顯佢作為歐洲頂級中鋒嘅功架，首次為車仔正選上陣，就幫助夏薩特梅開二度，球隊仲成功力保不失，整體表現明顯有提升，算係為嚟緊硬撼巴塞嘅大戰熱好身。呢場新加盟嘅艾馬臣柏美尼好大機會獻出首演，車仔預計會派副選應戰，未必會大勝。
主場遇侯城小勝居多
相反跌落英冠嘅侯城，今季唔好話爭取重回英超，就連英冠席位都危危乎，新年前仲炒埋帶咗半季嘅俄國主帥施盧斯基，本土教頭艾堅斯接手後表現未見起色，球隊英冠僅僅比降班區多出1分，護級形勢嚴峻，邊有閒情兼顧盃賽。好彩侯城雖然近7仗面對車路士輸咗6場，不過其中6仗開2球或以下，可見往績佔下風嘅侯城唔至於場場大敗，呢場撞正車仔同巴塞大戰當前就住踢，中位數2.5球入球細絕對值得追捧。