新正頭和氣生財
另一場英足盃16強，英超李斯特城主場鬥英冠錫菲聯，「狐狸」李斯特城因為主將馬列斯「玩失蹤」，搞到近期成績插水，即使呢位阿爾及利亞國腳已經歸隊，但恐怕已經無心戀戰，唔使旨意佢拯救球隊。錫菲聯礙於實力有限，應會主守，博打和返主場重賽，最好揀入球細。
（Now 631及668周六凌晨3時45分直播）
馬列斯上月轉會曼城失敗，擅自「放假」失蹤，搞到隊波喺英超作客輸畀愛華頓，主場僅打和史雲斯。馬列斯上仗英超終於歸隊，但只係後備上陣，結果被曼城大炒5比1。馬列斯嘅自私行為無疑已經損害球隊士氣及團結性，就算領隊佩爾派佢上陣，恐怕隊友都唔想再同佢合作。不過，如果佩爾收起馬列斯，李斯特城實力亦受削弱，可謂陷入兩難局面，加上踢盃賽，戰意成疑，難大勝錫菲聯。
錫菲聯曾於季初英聯盃以1比4慘敗畀李斯特城，相信吸取教訓之後，今仗應該會打醒十二分精神，做好防守工作。英足盃由8強至決賽都係1戰定勝負，換言之16強係最後一圈打和可以重賽，錫菲聯應會把握機會，只要今場守和，返回主場踢重賽，就有更大機會爆冷晉級賺多啲，點都要力保不失。