奧斯達辛斯未開咧輸蝕
今晚歐霸盃32強首回合瑞典球隊奧斯達辛斯主場對英超阿仙奴，奧斯達辛斯首度踢歐霸入到淘汰賽階段，已經超額完成；「兵工廠」聯賽被拋甩，爭入前4唔易，想踢下屆歐聯似乎得番贏歐霸一途，今晚趁住主隊仲未開咧，狀態輸成條街，阿仙奴搶得就搶，度士推介2.2倍讓球客勝！
（Now 633周五凌晨2時直播）
「歐霸新丁」奧斯達辛斯之前未試過同英超兵交手，但就同英格蘭甚有淵源，皆因教頭樸達係少數出國搵食嘅英格蘭主帥，隊內亦有賀普古特及居迪斯艾華斯等「英兵」。球隊7年前仲喺第4級別聯賽打拚，近年喺樸達帶領下穩步上揚，升上頂級聯賽之餘仲贏埋瑞典盃，獲得歐霸入場券，不過瑞典超新球季要4月先開咧，佢哋狀態點及阿仙奴，就算主場出擊都幫唔到手。
韋碧克有得落場砌到盡
阿仙奴係冬季轉會窗大執位，前多蒙特孖寶奧巴美揚同米希達利恩雙雙入「廠」，令阿仙奴進攻模式有所變化，前仗一齊落場大炒愛華頓就令人印象難忘。雖然奧巴美揚因為代表過舊會多蒙特踢歐洲賽，未合上陣資格，另一箭頭拿卡錫迪亦整傷膝頭要抖6周，領隊雲格手上得番韋碧克一位前鋒，但佢有得落場必然砌盡搏表現，面對未谷起嘅奧斯達辛斯，阿仙奴首回合要攞威唔難，進取啲揀讓球客勝。