流浪者反常主場冇料到
今日下午西悉尼流浪者主場迎戰榜尾嘅威靈頓鳳凰，流浪者自從新帥甘巴爾上任後，似乎已重拾正軌，但可惜球隊今季主場成績欠佳，仲差過作客！反觀客隊鳳凰今季作客試過有佳作，所以我認為佢哋今日有力一戰，鳳凰受讓平半必揀下盤。（有線64及203台周日下午4時直播）
儘管澳職仲有一段時間先會進行季後賽，不過想入圍嘅球隊就要寸土必爭，每場常規賽都唔可以錯過機會，相信依家排第7位嘅西悉尼流浪者就有好大感覺！「西流」雖然上場擊敗中岸水手，但留意嗰場波「西流」係作客。今季我好幾次都喺直播時提及，佢哋係一支奇怪球隊，11場作客只輸過3場，可惜地頭優勢就唔多明顯，7場主場只贏過2場，證明球隊主場出擊讓波，上盤實在係高風險！今日陣容仲要冇咗中場指揮官艾華路施祖度，難免削弱進攻實力。往績上「西流」近7次主場對威靈頓鳳凰，只得3勝，所以今日就算主場出擊，要全取3分都有一定難度！
鳳凰射手卡路查奴域有望復出
威靈頓鳳凰雖然依家敬陪末席，但近期作客成績唔錯，傑作係1月份作客擊敗勁旅紐卡素噴射機。中前場人腳上亦漸趨完整，斐濟翼鋒基舒拿復出，前線仲有「危險人物」卡路查奴域可望能趕及上陣。單純以攻力計，可能重強過主隊「西流」。所以，我估鳳凰今日作客可能爆冷，絕對有道理！