賽程密輪休見好就收
英格蘭足總盃16強重賽今晚上演壓軸戰，英超熱刺坐鎮溫布萊球場再鬥「英甲仔」羅奇代爾。牌面上梗係熱刺高幾班，但佢哋近期賽程緊密，未必會花額外精力爭取大勝，只求穩陣完成晉級任務，王牌前鋒哈利卡尼幾乎肯定會休息，今仗好大機會小勝晉級，3.5球嘅入球細有1.88倍非常值博。
（Now 630、635及ViuTV 99台周四凌晨3時45分直播）
熱刺喺今屆英足盃已經第2次被對手逼和而需要重賽，上圈鬥英乙嘅紐波特郡，同樣係先作客打和，重賽至喺主場小勝2比0晉級。事實上隨住主要戰線歐聯重開，熱刺更加要做好留放，陣內比利時中堅維頓漢因足踝受傷缺陣，領隊普捷天奴肯定唔希望下周中歐聯16強次回合對祖雲達斯前，再出現更多傷兵，相信會吩咐球員錫身至上。
哈利仔未必上陣難大炒
熱刺今仗留力事在必行，哈利卡尼、迪利阿里、洛里斯同基斯甸艾歷臣等核心好大機會先作後備甚至休戰，不過熱刺副選球員質素唔算太高，後備中鋒洛蘭迪差唔多兩個月未入過波，何況熱刺近6仗主場賽事，有5仗總入球數字都係3球或以下，今仗望佢哋大炒對手可能只係球迷一廂情願。
作客嘅羅奇代爾只係英甲榜尾球隊，難得嚟到溫布萊肯定「泊大巴」，就算冇能力守和，至少都想減低「傷亡數字」，面對「見好就收」嘅熱刺，有望靠一人走多步拉近實力差距，3.5球細盤好路。