C朗專爆愛斯賓奴
西甲周中開快車，周三凌晨愛斯賓奴將會主場挑戰皇家馬德里。皇馬一班進攻好手近排交足功課火力全開，尤其頭號球星C朗入波停不了，成為球隊連場大捷嘅主要動力，更令「銀河艦隊」近6仗全開4球或以上，今場面對主場表現飄忽兼實力差幾班嘅愛斯賓奴，一發不可收拾嘅皇馬絕對有力再數胡，中位數3.5球入球大點可以錯過？
（Now 632周三凌晨3時直播）
沉睡咗大半季嘅皇馬，近期終於有蘇醒迹象，聯賽取得4連勝，有番西甲勁旅應有嘅霸氣之餘，仲喺歐聯16強首回合3比1擊敗強敵PSG，搶得關鍵先機。踢得咁順真係要多得一班弗爆攻擊手，其中「BBC」組合加里夫巴利、賓施馬及C朗上仗齊齊有波入，幫球隊4比0炒起艾拉維斯，默契同狀態返晒嚟，尤其C朗近4仗都有波入，喺聯賽射手榜已經攀升到第4位，呢位求勝心極重嘅葡萄牙前鋒同宿敵美斯鬥足咁多年，今季就算發力稍遲都肯定唔會輕易認輸。
皇馬攻擊手着晒火
況且C朗近年每逢對愛斯賓奴腳風都特別順，近3仗作客個人就數夠8球，今場再遇「私房菜」又點會同佢客氣？加上盧卡斯華斯基斯同馬高阿辛斯奧等皇馬副選近排都屢建奇功，球隊進攻板斧咁多，愛斯賓奴想嘜實都唔係咁易。
愛斯賓奴已經近6仗聯賽未贏過，雖然佢哋近4仗全部和波，不過球隊近年遇上皇馬都冇乜好結果，近3次主場都畀「銀河艦隊」反客為主擊敗失咗12球之餘，仲有兩場開4球或以上，可以話全無還擊之力，今場面對回勇嘅皇馬，愛斯賓奴難逃大敗嘅命運，捧中位數3.5球入球大最穩陣。