米希達利恩 雷霆救兵
正所謂不是冤家不聚頭，阿仙奴星期日喺英聯盃決賽吞曼城3蛋後，今晚英超補賽返主場再鬥「藍月亮」，上演復仇戰。今季倚賴主場搵食嘅阿仙奴，仍未放棄爭入前4名，搶奪下屆歐聯入場券，加上「兵工廠」近年聯賽主場專剋曼城，難得今場受讓，必捧讓球主勝。
（Now 621及LeSports周五凌晨3時45分直播）
米希達利恩回歸火力增
雖然喺歐霸盃封王亦可獲得歐聯參賽資格，不過阿仙奴主帥雲格多次強調唔會放棄聯賽，而且球隊喺歐霸16強抽中對意甲勁旅AC米蘭，要順利闖關絕非易事，爭奪聯賽前4仍然相當重要。雖然「兵工廠」啱啱先輸大大鑊，不過今仗有米希達利恩復出，配合奧斯爾同老拍檔奧巴美揚，預期攻擊力會比上仗決賽提升唔少。
事實上，阿仙奴今季表現雖然令人失望，但佢哋喺酋長球場出擊仍然畀到球迷信心，今季13仗聯賽主場賽事只係輸過1次，另有10場贏波同2場和波，加上「兵工廠」近4次聯賽主場迎戰曼城，一共拎到1勝3和不敗成績，可見酋長球場明顯剋住「藍月亮」。
曼城戴爾夫停賽露缺口
曼城目前喺聯賽「一哥」位置有無可動搖嘅優勢，大家都明白封王只係時間問題，論鬥心或者唔及主隊，而且曼城有左閘戴爾夫坐波監，無論起用丹尼路雷斯或新仔辛真高，都未能畀到人信心，隨時被速度極快嘅阿仙奴右閘比利連瘋狂爆破，曼城要作客奏凱有難度，主隊受讓當然捧讓球主勝。