阿仙奴每年踏入2月都係斷腸時，經常都喺呢段時間甩轆，令原本在季初開靚個頭有機會爭標，退而求其次爭前4嘅歐聯入場券，今季仲弊，不但喺英聯盃決賽慘吞曼城3蛋，昨晨聯賽再鬥曼城又輸0比3，依家落後「4哥」熱刺10分，甚至落後第5位嘅車路士8分，連保住歐霸席位都成問題，何解呢？
現代足球金錢掛帥，尤其係應付漫長球季，最講求耐戰力，若果本身係兵微將寡，難免去到某階段會跌Watt，況且阿仙奴主帥雲格性格固執，認為唔值得為收購1名頂級球星斥資太多，理念雖好，但競爭力卻不斷下降，令阿仙奴從爭標分子，淪為爭4狂魔。而且美國班主高安基最睇重盤數，成績欠佳冇問題，最緊要年年有錢賺，因此「守財奴」雲格獲永續，可惜成績每況愈下，更難吸引世界級球星來投，冬季轉會窗簽入只屬二流嘅前多蒙特孖寶奧巴美揚及米希達利恩，形成惡性循環，被列強愈拋愈遠。儘管阿仙奴門神施治尚算穩健，但畢竟佢已經35歲，撲救反應難免慢半拍（正如現年33歲嘅著名騎師莫雷拉向筆者透露，再征戰3年後，佢肯定難再像現時般叱咤本港馬壇），前中後3線整體水準未有提升，造成今季聯賽、盃仔雙斷腸慘況。