英超護級形勢勁亂，喺剩低10輪情況下，除榜尾西布朗稍稍被拋甩外，由第9位嘅愛華頓到「尾2」嘅史篤城都只得8分差距，邊隊降班有排估！今晚幾支護級兵正面交鋒，場場「6分波」，肯定鬥到血肉橫飛！
屈福特剪布有保證
屈福特主場對包尾大幡西布朗，西布朗可以話形勢最惡劣，同「安全線」嘅水晶宮仲差7分，而且近5仗聯賽1和4負，狀態勁曳，新兵史杜列治加盟冇耐又要長抖，季中接手嘅「舞王領隊」柏杜就算跳埋回魂舞，都難救西布朗出火海。主隊屈福特雖然表現飄忽，不過間唔中畀到球迷驚喜，尤其近4仗主場3勝1和，仲曾以4比1贏過車路士，質素較有保證，少讓平半1.81倍上盤捧得過。
（Now 623及LeSports周六晚11時直播）
修咸頓大軍圍城
修咸頓主場面對「尾2」史篤城，「聖人」排名雖然高3級，查實分數僅多1分，加上修咸頓未來賽程多為作客，仲要兼顧足總盃，趁主場必搶攻爭取入波。作客嘅史篤城護級倚重梳頓沙基利，佢近3仗場場射入關鍵入球，狀態弗爆，加上近期作客頻開大，近5仗4次開3球或以上，呢場肯定唔會死守放手一搏，中位數2.5球嘅大盤，有2倍回報唔好錯過。
（Now 625及LeSports周六晚11時直播）
史雲斯靠主場爆錘
「尾3」史雲斯坐鎮自由球場迎戰「錘仔」韋斯咸。「天鵝」人腳唔算標青，但喺葡萄牙主帥卡路士卡維奴帶領下，近6主場錄得全勝，仲曾先後擊敗過利物浦同阿仙奴兩支「Big 6」，擺明主場演出有把握，今仗更有前「錘仔幫」阿休倒戈相向，面對近3仗作客輸晒嘅韋斯咸，史雲斯為早日脫離降班區減壓，必借主場威力擸晒3分，1.76倍平手盤必捧主隊。
（Now 624及LeSports周六晚11時直播）