3叉戟橫行霸道
英超今晚有入球Show上演！近期狀態弗到漏嘅利物浦，於晏菲路恭候紐卡素，「紅軍」有「埃及美斯」穆罕默德沙拿領軍，佢近9場波入10球，絕對係入球保證；紐卡素要為護級搏命，倒戈主帥賓尼迪斯更加唔想喺晏菲路球場食蛋咁失威，中位數3.5球入球大有2.1倍極為好路！
（Now 621及LeSports周日凌晨1時30分直播）
利物浦近期火力全開，沙拿喺英超入咗23個士哥，只差射手榜首位哈利卡尼1球，當然會盡力把握每個入球機會搶金靴獎。除咗「埃及美斯」外，上半季腳風麻麻嘅沙迪奧文尼亦「返晒嚟」，近2仗入4球，加上近6仗入5球嘅羅拔圖法明奴，「紅軍3叉戟」可以話令英超對手聞風喪膽。
賓帥倒戈最想入到波
利物浦入波能力唔使懷疑，不過防守亦唔多掂，近6仗主場賽事全部有失球，好似贏曼城4比3就係靠前線打救，足總盃更試過2比3輸畀西布朗而出局，既然利物浦近4仗主場總入球都至少有4球，今仗大盤梗係信心十足。
紐卡素身處降班漩渦，只比「尾3」嘅史雲斯多2分，雖然近4仗聯賽獲1勝3和不敗佳績，不過佢哋造訪「Big 6」防守曳到爆，今季兩次作客車路士，及作客曼市雙雄嗰4場波，每仗都失3球或以上，面對頂級攻擊線明顯無計可施，唯一慶幸係主力射手杜韋加爾啱啱打破13場波入球荒，領隊賓尼迪斯重返晏菲路，亦唔想失威起碼要入到波唔好食蛋，今仗大騷可期。