聯賽榜3哥史浩克04近期兩連勝狀態火熱，過去喺主場迎戰首都球會一向有心得，佢哋近9次主場遇上哈化柏林取得全勝，今晚睇牌面應該秤先啲，不過不利消息係今季聯賽已入8球嘅首席射手古多貝斯托拿累積5面黃牌要停賽，前線頓失重心，更慘嘅係中場主力哥列斯卡上輪作客贏利華古遜嘅比賽，踢到下半場中段傷出，過去一周未能跟足操練，狀態未足預期今仗會先任後備，如果冇埋呢位今季已交出4入球3助攻嘅領軍人物，球隊火力勢必進一步削弱，未必咁易咬得入近期一心一意主守嘅哈化柏林，主W得1.57倍實在太奀，推介1.72倍嘅中位數2.5球細盤。
哈化作客細頂史浩克
哈化柏林歇冬後7場聯賽只得1勝，睇落當然唔叻，但亦只係輸過兩場，教頭戴達明白限米煮限飯唔敢貪心，決意加強防守搶得1分得1分，近期防線組織極為嚴密，就算反擊時防線都唔敢壓得好上，結果喺今年7場聯賽全部開出中位數2.5球嘅細盤，近3場作客都保持零失球，上輪作客安聯球場遇上班霸拜仁，佢哋一樣由頭頂到尾，最終0比0悶和強敵攞到意外1分之餘，仲難得保持今季兩循環鬥拜仁都不敗紀錄。今晚作客遇上另一前列分子史浩克，戴達部署上根本唔使多諗，梗係繼續守埋佢，咁入波又點會多呢？