雙箭頭晒冷數胡
周六下晝多場亞洲波，阿King送上過關心水益大家。澳職頭場上演重量級對決，「二哥」紐卡素噴射機將會主場硬撼「一哥」FC悉尼，悉尼過去9次對噴射機取得8勝1和佳績，加上球隊雙箭頭今季腳風順到爆，客勝係心水之選。
（myTV SUPER 303台周六下午2時35分直播）
今季崛起嘅噴射機絕對係澳職嘅一大焦點，不過比起傳統勁旅FC悉尼，噴射機表現明顯差啲火候，尤其近期狀態甚為飄忽，聯賽近5仗只得2勝2和1負頻頻失分，加上今場有隊長兼主力後衞保加特受傷仲未必出得，防線有隱患，面對實力超班嘅FC悉尼，後防隨時出事。
鯨魚心雄追多鋪
FC悉尼有幾超班？睇睇佢哋兩大前鋒保保同美亞斯祖斯基喺聯賽嘅破門效率就即刻明晒，尤其近2仗入3球嘅保保更高踞射手榜榜首，有佢在陣嘅悉尼絕對有力再下一城，客勝咪走寶。
另外再揀場遲少少開波嘅布里斯班獅吼主場對阿德萊德聯，陷入主弱客強困局嘅獅吼，近8主場錄得1勝7負劣績，不過佢哋半場依然可以守得住，近4次主場出擊就同對手半場打和，今場隨時照辦煮碗，一於追半場和。（myTV SUPER 303台周六下午4時50分直播）最後日職名古屋鯨魚主場鬥磐田山葉，重返日職嘅鯨魚開咧首戰落後劣勢下，反勝大阪飛腳全取3分，士氣大振，巴西「4億男」前鋒祖奧狀態已經撻着，今場有力繼續數胡，主勝不妨再追。（周六下午1時開賽）