爭入季後賽搏甩髀
近期澳職特別多打吡大戰上演，今日呢場好嘢聚焦墨爾本，由墨爾本城主場迎戰墨爾本勝利。依家「墨城」排聯賽榜第3，「勝利」排第4，兩隊相比之下，殺入季後賽形勢就以「墨城」比較穩陣，畢竟佢哋有33分在手，而「勝利」同第5嘅阿德萊德聯同分，只係比第6嘅西悉尼流浪者高3分！為求確保常規賽前6入季後賽繼續有得玩，嚟緊每一場都要Keep住鬥心。睇番兩隊波近期狀態，相秤之下，今日一定支持「勝利」攞到勝利。
（有線64及203台周五下午4時50分直播）
墨城連敗又唔齊腳
「墨城」近期狀態飄忽，先係大敗畀FC悉尼，上仗更加喺領先下，倒輸畀珀斯光輝，隊波士氣受到一定影響，今日仲有中堅舒恩基維特要停賽，對於近期已經不穩嘅防線更加係雪上加霜。積分榜形勢上，由於頭兩席嘅FC悉尼同紐卡素噴射機已經彈出，「墨城」要追上已經相當困難，但佢哋又領先第6位嘅「西流」7分，有些少高不成低不就嘅感覺，我都驚佢哋戰意唔夠，加上當家箭頭人物科拿路利今場又出唔到，睇嚟今日都係信唔過。
反而「勝利」近況理想，上場喺回飛情況下贏咗阿德萊德聯，成場波表現出爭勝決心。依家為咗保住喺前6，鬥志一定高昂，況且「勝利」陣容相當完整，前線尖刀貝利沙、巴巴路西斯、利萊佐治全部可以上場，進攻火力強大，今日一於要「勝利」。