防線齊腳頂得住慢熱紅魔
周二凌晨英超獨腳戲，水晶宮主場挑戰「紅魔鬼」曼聯。水晶宮近期傷兵情況嚴重，尤其係前線人腳捉襟見肘，好在呢場有兩大後防主力及時復出，面對實力高一籌嘅紅魔夠料死守，況且曼聯喺客場不嬲慢熱，水晶宮隨時藉地利頂得兩嘴，半場和有2.2倍博得過。
（Now 621及LeSports周二凌晨4時直播）
水晶宮自老帥鶴臣季中接手後，表現回勇絕對係有目共睹，不過佢哋似乎黑氣未除，班主力輪住嚟打柴，人數之多幾乎夠砌隊「傷兵Eleven」，搞到鶴臣頭都痕！尤其進攻核心韋費特沙夏，呢位科特迪瓦射手季初倦勤多場之後，踢咗一排喺上個月又傷過，好彩有消息指佢恢復進度超乎預期咁快，唔使幾耐就可以復出，不過就未必趕得切呢場。
反而後防方面，2位主力後衞馬田基利同舒洛比都傷愈有望披甲，令防線有番啲保障，而且水晶宮今季喺主場屢有佳作，包括逼和「1哥」曼城，仲擊敗過車路士，上仗同熱刺都係鬥到臨完場前先失波，可見班波質素唔差，有力同Big 6周旋。
曼聯作客冇霸氣
另邊廂，多得領隊莫連奴嘅保守戰術，曼聯作客踢落同中下游球隊無異，攻力弱到嚇親人，近7場客戰上半場只入2球，上周中歐聯作客西維爾就見晒底，畀對手撳住砌，若非門將迪基亞屢作「神救」，絕無可能悶和0比0！咁消極踢法自不然引起唔少魔迷誹議，之不過莫連奴叫得做「寸王」，邊有咁容易妥協！加上新兵阿歷斯山齊士加盟咁耐喺前場都唔係好幫得手，仲似乎「上腳」太多，有破壞球隊進攻節奏之嫌，前線有阻滯睇怕曼聯都好難咁快取得入球，半場和值博。