巴塞搶W止咳
今晚西甲爆發榜首大戰，榜首巴塞隆拿喺主場火併「二哥」馬德里體育會。巴塞近期喺聯賽頻頻失分，搞到畀馬體會愈追愈近，實在不容再失，好彩每逢聯賽交鋒經常食住馬體會，王牌美斯更加係對手嘅剋星，巴塞為將積分甩開鞏固「一哥」位必搏盡，主勝有計。
（now 632周日晚11時15分直播）
原本一枝獨秀嘅巴塞，近期喺聯賽表現開始有啲Hea，雖則依然保持不敗金身，但近5仗只得2勝3和失咗6分；相反馬體會就聯賽6連勝，追吓追吓依家只落後5分，如果巴塞今仗有乜依郁輸波嘅話，雙方差距就會縮窄至2分，令到本來穩袋嘅聯賽冠軍出現暗湧，因此「地上最強」必定全力爭勝。儘管馬體會近年喺歐聯成日剋住巴塞，不過返到聯賽就係另一回事，單計近7次聯賽交手，巴塞取得5勝2和不敗佳績，明顯喺聯賽食住「床單兵團」。
美斯特別順基沙文捧蛋
而且馬體會堪稱巴塞王牌美斯「第2至愛嘅西甲球隊」，點解咁講？因為美斯曾27次攻破馬體會大門，包括3次大演帽子戲法，馬體會係畀呢位阿根廷球王入波第2多嘅西甲球隊，所以對親佢哋都零舍醒神。相反，周中對雷加利斯食出大四喜嘅馬體會射手基沙文，每次造訪巴塞嘅魯營球場例腳軟，無論係效力皇家蘇斯達定馬體會，先後11次作客魯營比賽，結果全部食白果，仲要只得2和9負未贏過，兩軍王牌表現高下立見。巴塞為免除後患，必趁機贏波甩開馬體會，主勝不容錯過。