米蘭打吡強撐ＡＣ
周一凌晨意甲獨腳戲，ＡＣ米蘭將會和國際米蘭上演同市打吡。米蘭雙雄共享同一座聖西路球場，因此兩隊聚頭例必打到火花四濺，今次輪到ＡＣ米蘭掛名主場，戰況肯定唔會例外，尤其ＡＣ米蘭近期回勇勢頭一時無兩，聯賽近3主場仲大獲全勝，各項賽季近6仗仲未失過波，呢場面對進攻疲弱的國米，贏面肯定較高，平手盤肯定捧番ＡＣ米蘭。
（無綫 myTV SUPER 302台周一凌晨3時45分直播）
ＡＣ米蘭新帥加度素季中接手球隊開局其實唔算順利，仲曾經一度畀人質疑佢唔夠班做紅黑軍團嘅掌舵人，不過路遙知馬力，球隊近排表現漸入佳境，而加度素向球迷力證自己嘅執教能力之餘，亦成功帶領球隊擺脫季初飄忽嘅表現，聯賽近8仗取6勝2和不敗戰績。班波走勢咁勁，全因主帥加度素夠膽起用一班自家青訓出身嘅年輕球員，除咗有已經為人熟悉嘅後生門神基安盧基當拿隆馬，幫助球隊近6仗力保不失之外，仲有年僅20歲嘅前鋒柏德列古度尼，佢今季多次為球隊射入關鍵波，包括上仗聯賽面對強敵羅馬為球隊先拔頭籌，ＡＣ米蘭前後場都有質素唔錯嘅後生仔擔大旗，呢場打吡戰有力取勝。
國米鋒線弱難破關
國米早前雖然終結長達8輪嘅聯賽不勝紀錄，不過球隊鋒線疲弱嘅問題依然嚴重，上仗面對聯賽包尾嘅賓尼雲圖，都只係靠兩個後衞挺身而出入波，先可以全取3分，加上前鋒莫路伊卡迪啱啱傷愈復出，狀態未必咁快可以恢復，面對防守表現明顯有改進嘅ＡＣ米蘭，攻力欠奉嘅國米難有本錢破門，呢場平手盤都係捧番ＡＣ米蘭較穩陣。