阿仙奴打翻身仗收禮
近期多災多難嘅阿仙奴今晚英超早場作客白禮頓，將會係反彈好時機！阿仙奴作為英超「Big 6」，今季作客只得3勝4和7負，梗係唔收貨，好在白禮頓今季7次喺聯賽對「Big 6」全部輸晒，未踢先腳軟，「兵工廠」可憑較佳個人質素取勝，1.75倍客勝屬信心推介。
（Now 621及LeSports周日晚9時30分直播）
阿仙奴喺英聯盃決賽輸畀曼城同獎盃擦身而過，歐霸16強又要硬撼意甲豪門AC米蘭，想攞冠軍冇咁易，因此聯賽雖然大落後都唔可以放棄住。「兵工廠」近4仗英超作客未贏過，但球隊今季首循環面對3支升班球隊，包括白禮頓、紐卡素同哈特斯菲爾德全勝之餘，仲射入8球0失波，可見佢哋對住「新丁」特別有計。
白禮頓「欺善怕惡」
白禮頓風格「欺善怕惡」，今季7次贏波，除屈福特外，其餘6仗對手現時聯賽排名都低過自己，面對「Big 6」全敗之餘勁失18球，所以就算阿仙奴近況再差，今晚依然有力撕破白禮頓防線，相信可以擺脫頹勢全取3分。