曼城難讓飢渴車仔
唔經唔覺今季英超剩番10輪，放到甩轆嘅曼城捧盃只係遲早嘅事，佢哋上周贏完聯賽盃之後並冇鬆懈，周中英超快車又炒多鑊阿仙奴3粒，今晚返主場迎戰車路士有大把本錢在手，戰意隨時唔及已跌出前4急需搶分嘅車路士，曼城讓半一上盤低水唔吸引，樂比冷敲車仔2.15倍下盤。
（Now 621及LeSports周一凌晨零時直播）
曼城連續兩仗派３蛋畀阿仙奴，表現出嚟嘅水準完全係另一個層次，但同時阿仙奴防線實在暴露太多空位，畀曼城為所欲為，呢方面車路士肯定唔會畀對手踢得咁輕鬆，淨係睇佢哋歐聯16強首回合對巴塞隆拿場波，反擊戰術相當奏效，連曼城領隊哥迪奧拿都大讚干地係戰術大師。
當然，今季嘅車仔亦存在唔少問題，干地就埋怨球會唔開水喉，好似佢上季接手後，喺轉會市場上扣除出售球員只係使咗9,000萬鎊左右，輸曼城嘅3.5億鎊成條街，但其實車仔季中亦補充咗唔少新血，不過基奧特至今仲未融入；巴克里表現亦唔符合干地要求，另外艾華路莫拉達近期嚴重走樣，只得夏薩特長期維持高水平，佢之前７仗對曼城製造咗４個入球同４次助攻，車仔今場都要靠佢同韋利安呢兩位「突擊孖寶」。
曼城今仗仍有費蘭甸奴倦勤，冇咗佢喺中場掃蕩肯定有影響，仲有基爾獲加亦喺上場勇戰受傷，佢同史達寧今仗都無緣上陣，至於車仔則有泰莫爾巴卡約高缺陣，預計法比加斯今場會同「飲水哥」真禾特、尼高路簡迪組成３人中場線穩固中路。
「藍戰車」對Big 6不敗率達７成
未計尋晚戰果，車仔目前落後熱刺２分及利物浦４分暫排第５，來季要踢歐聯嘅話就不容有失，車仔近年對曼城嘅戰績唔曳，近６次交手各贏３次，上季作客曼城亦創造過勝３比１佳績，睇番車仔今季聯賽對Big 6嘅７場波只係輸咗２場，不敗率達71%，又未輸過２球或以上，受讓半一呢個下盤值博率高。