今晚歐聯16強次回合仲有場曼城主場對巴素利。喺英超奪冠在望嘅曼城完全冇留力包袱，可以全心應付歐聯，首回合就算作客下，憑超班實力大炒巴素利4比0，搶盡先機，細鬼認為「藍月亮」今晚坐鎮更為強勢嘅主場，贏波晉級冇難度，分分鐘再炒多鑊唔奇，就算讓到兩球咁辣，1.74倍上盤照樣推介。
（有線62及202台周四凌晨3時45分直播）
主帥哥迪奧拿帶領曼城第2季，唔只將控球戰術發揮得淋漓盡致，仲成功憑呢招喺英超橫掃，當中阿古路、奇雲迪布尼等固然大勇，而主導大局嘅墮後中場呢個重要角色，雖然今季大部分時間擔正嘅費蘭甸奴近期受傷，好在有德國國腳根度簡及時頂上，佢上仗為球隊交出驚人嘅167次成功傳球，幫助球隊砌贏強敵車路士之餘，仲打破英超史上個人單場成功傳球紀錄，可以話係「藍月亮」嘅無名英雄，首回合作客對巴素利，亦係憑佢梅開二度為球隊打好基礎，話唔定今晚又有得數胡。
巴素利近況低迷
瑞士球隊巴素利過往14次歐戰作客英格蘭成績慘淡，錄得1勝5和8負，加上近期走勢疲弱，除首回合畀曼城大炒外，近4仗國內賽事亦輸足3場，兼夾入得兩球，根本冇可能威脅到主場勁爆嘅曼城，曼城想勒都勒唔住，上盤照捧可也。