今晚歐聯續有兩場16強次回合上演，重頭戲必屬英超熱刺主場硬撼意甲班霸祖雲達斯。首回合打和2比2，表面上熱刺搶得兩個作客入球，今仗返溫布萊主場只要打和0比0甚至1比1都可以出線，優勢明顯，而且首回合祖記係先入兩球下，有希古恩操刀第2球12碼宴客，埋下被追和嘅伏線，氣勢上難免不及反敗為和嘅熱刺。
不過，近日有意甲老牌球隊費倫天拿中場艾斯托利不幸猝死，全國上下哀悼，剛周日7場意甲亦宣布改期，包括筆者本來要負責評述嘅米蘭打吡。如此傷痛時刻反而能刺激起「祖記」球員嘅鬥心，正所謂哀兵必勝，呢種從哀傷中激發出嘅精神力量，往往能拉近實力上嘅分野，況且首回合係打和，即係話祖雲達斯今仗贏波就可以出線，目標更鮮明，加上「祖記」歐洲賽經驗遠勝熱刺，筆者認為「老婦人」有力一戰。
至於另1場曼城主場對巴素利，由於「藍月亮」首回合作客大勝4比0，只要唔輸多過3粒就肯定晉級，喺咁大優勢之下，作戰心態係點有啲難估，都係忍手不賭為妙，睇波算數。